( رباعيات مظلوم )
إفتل ياعم حبال
واربط فيها همومك
وغنى كام موال
ونفض بقه هدومك
شقيان فى عينك نوم
وعرقك فى يد فاسك
مالكشى راحه ف يوم
ومكتومه كده أنفاسك
وحقك كمان مهضوم
من أهلك وناسك
والميه فيها سموم
إشرب بقه كاسك
رجليك بتنزف دم
والشق ف كعابك
والجرح نازف هم
والفقر داقق بابك
تصحى بصوت عصافير
وغيرك نايم مرتاح
والميه فى قلب الزير
بتبكى عليك بنواح
بيدك بتزرع خير
وبرضه مش نافع
وخيرك أكيد للغير
وتعبك ماهوش شافع
ديماً حزين مظلوم
وهدمته كستور
والكل عليك بيلوم
وانت عايش مستور
عايش ياعينى غريب
مالكشى هنا أوطان
ياحكومه كفايه عيب
فلاح بدون عنوان
=================
الشاعر /عيسى عبد الرؤوف
الأحد فبراير 01, 2015 7:16 am من طرف 
اليومية
