اصدق مين يامصر
ومافيش شفافيه
الكل عايز قصر
وإحنا فيكى ضحيه
مابين حكومه ومواطن
شارع ظلام عتمه
حتى إللى فيكى فاطن
بيلطم كل يوم لطمه
عايزيين ياعم صراحه
ونعيش سوا ع الخير
أصل الصراحه راحه
بتخللى المراكب تسير
تعبنا م التعتيم
وجدار وراه ستار
وكلام ياريته سليم
ولع شوارع نار
شاورى وقوليلى مين
يامصر فيكى الخاين
العدل فيكى دفين
ليه بس مش باين
فى كل يوم خراب
ودمار ف الجامعه
وموت ونعق غراب
وعيون فيها دمعه
إيه ذنبى بس ياناس
والفقر ماسك هدومى
وليه الفقير ينداس
مش لاقى طعام يومى
كان الحال مستور
ورزق يوم بيوم
صبح الايجار مكسور
والبيت مليان هموم
أحيب منين أنا حاير
للأكل والمدارس
لوفات شهر فبراير
اجيب منين لمارس
الثوره مكسب ناس
واحنا اللى دفعنا التمن
شربنا مر الكاس
طول عمرنا من زمن
يارب انت قدير
تنتقم لنا م الخاين
طالبيين يارب الخير
وف مصر مش باين
=================
الشاعر عيسى عبد الرؤوف
الأحد فبراير 01, 2015 7:16 am من طرف 
اليومية
