........بحبك يامصر ...........
بحب الدنيا ف عيونك
ولونى القمحى من لونك
ياحبيبتى يامصر ياغاليه
وجيشك هو دا حصونك
بحب المادنه والمدفع
أطلبى عمرى انا هدفع
فداكى عمرى وولادى
ولو ناديتينى أنا هسمع
هجيكى بعمرى وأتمنى
وعلى بابك أنا أستنى
تزول الغمه لسماكى
وأزرع أملى ف الجنه
ياأجمل نغمه على عودى
ياشايله حواجزى وسدودى
وجيشك عزه يابلادى
حامى لديارى وحدودى
أنا سامع نغم طيرك
أنا عايش على خيرك
أنا فلاح ودى فاسى
أنا راسم خطوط سيرك
أنا الطبله وأنا المزمار
انا حالف لتبقى عمار
وهعزف يامصر ياحبيبتى
حروف إسمك على الأوتار
أنا البانى أنا الصانع
وعن حبك مافيش مانع
اقوم ابنى ف عز الليل
لخيرك قمح فى صوامع
فيكى الهرم فيكى القلعه
وصبيه جايه بالزلعه
والكل طمعان كده ف خيرك
وقلوب هناك سوده ووالعه
فيكى النيل فيكى الاثار
فيكى الطيبه قلوبها عمار
بحبك يامصر يابلادى
وف حبك أنا محتار
أنا مصرى أكيد محظوظ
ومن بلدى نجيب محفوظ
يامصر الفن والادباء
حروف إسمك كتاب محفوظ
على جبلك تجلى النور
وف القرأن جبال الطور
وكليم الله هنا ف أرضك
وتينك وزيتونك مابين سطور
وفى فنك فتحينلك باب
ثومه وحليم وعبد الوهاب
سطور بيضه فى تاريخك
ومحفوظه جوه كتاب
================
الشاعر عيسى عبد الرؤوف
الأحد فبراير 01, 2015 7:16 am من طرف 
اليومية
