مصر فنجان قهوه
فيها كدب وفيها غش
شاربينه كده على سهوه
ساده حتى من غير وش
فيها الغنى منشار
زى الولد بيقش
ورزق الفقير محتار
من خرم إبره يخوش
الظلم فيها عداله
والعدل فيها ظلام
الحق فيها نداله
ماشيه كده بنظام
الفقر فيها وراثه
موروث من الأجداد
مرصود بكل حراسه
بقانون من الأسياد
حاطين المرض ف الميه
نمرض ونجرى عليهم
مكسبهم ميه الميه
وعلاجنا مابين إيديهم
ديماً كده ملوعنا
وتايهيين ف المستشفيات
متحكميين حتى ف وجعنا
ندخل يقولك إبرز وهات
والفرق حتى جوه حبس
مابين فقير ورئيس
باين كمان ف اللبس
مابين شريف وخسيس
إاللى سرق الشعب
سجين فى خمس نجوم
وإللى تحدى الصعب
بين الجدران مهموم
وإاللى ضحى بعمره ليكى
الشهيد إبن الفقير
قدم حياته عشان عنيكى
عشان يعيش إبن الوزير
هو ده فنجانك يامصر
طعمه صعب كله مرار
الغنى عايش فى قصر
والفقير عشه ودار
==================
الشاعر عيسى عبد الرؤوف
الأحد فبراير 01, 2015 7:16 am من طرف 
اليومية
