(معرفشى ليه )
معرفشى ليه يا مصر جوايا بيوجعنى
وكل ما أقول يا مصرولاحد يسمعنى
وأعدى بحر وبحر ولا شط يجمعنى
أيه يامصر !! ما تقولى وتردى
ضلوعي مفرودة وتوبي على يدّى
يا مصر جوايا كلام بيوجعنى
كل ما أقول يامصرألاقى الدمع يسبقنى
أزعل لكن أقول غُمّة وحتعدى
وبكرة الفجر يعود وأحصد أنا كدّى
وتعودى ليّا بلادى وفرحتى وودي
..................
قوليلى ليه يا مصر الدمعة ملكانى
وكل ما أداوى جرح يشب جرح من تانى
ليه يا مصر
دا أنا المقتول ودمى سايل و في ميدانك
دا أنا المصلوب جسدى هناك على أبوابك
أنا المظلوم وتايه وحدي في أحلامك
يامصر ليه بالحزن كسيانى
كل ما أخلع توبه ... توبه يهواني
يا مصر ليه بالفرح حرمانى
كل ما أودّع جرح .. جرح يلقانى
........
أنا كنت باغنّى وفرحان بوجودى
لمّا كسرت الطوق وعبرت لحدودي
وزرعت يومها الحلم ورويته من دمي
وقلت خلاص يا واد مصر بقت بمبى
يا مصر حاسس ليه فيكى وبالغربة
عايش حياتى أسير الدمع والكربة
العدل فيكى ميزان مايل على يمّه
والفجر طلع أوهام والحلم صار غُمة
بعد الرحيل قلت أنا الغلبان راح أتمنى
وقيدت شموع الفرح وأيدى فى الحنة
لقيت الفرح مش فرح ولا مصر بقت جنة
لمّا ميزان العدل فيكى يجرحنا
والجانى يصبح برئ بفلوسنا يدبحنا
والتوهة هى التوهة والجهل يدهسنا
والحلم يتوه م الحلم مسجون فى بروازنا
الأحد فبراير 01, 2015 7:16 am من طرف 
اليومية
