أنا الشعب
...............
كل اللى كان رجع والرُّوبه هي الرُّوبه
واللى قتل ثورتى داير يغنى التوبه
يادي السنين العجب ياغربتك يا شهيد
راحت دماك يا بطل والفجر لسّه عنيد
تلاتين سنه مجروح فاقد أعز حبيب
كل اللى كان رجع وفرحتى سرقوها
وعجبي يا ناس م العجب و بسمتى خنقوها
................
أنا اللى حلمى فجر لبلادى بيغنى
لاعايز أكون سلطان ولا عيشه تكون بمبى
....................
أنا لو جمل كان برك وعض الخِزان
والصبر لو كان جبل من همى كان مال
تلاتين سنه فارس أنا بدون عنوان
أنا الحلم اللى تعب م التوهه والحرمان
أرسم وجعى أمل وأفرش عيونى شال
وأحضن تراب الوطن وغنايا بالموال
...................................
أنا اللى حلمى أمل لبلادى تتهنى
وعزة تدوس ع الألم وبيها نتغنّى
أنا اللى حلمى شموخ وبلادى تكون جنّة
والعدل فيها ميزان والرحمة تكون خِله
حلمى بسيط يا هوه مش حته م الجنة
..............................
أنا مصري رغم الأسى أفديها وبدمي
مش لفظ ساعة صفا وعليها أتجنّى
....................
تلاتين سنة سرقوها ويقولوا عشاقها
باعوا البلاد والعباد ويقولوا دا عشانها
والعلم سافر بلاد والهزل على بابها
واللى انحنى ضهره يبوس تراب شالها
يعشق طيف الهوى لو رَن خلخلها
ماهوه دا اللى عايش يحلم ف أحلامها
لا عايز يكون سلطان بس عاشق نيلها
.......................................................
إلى التى تسكن فى خلدى وتسبح شريانى نعم . نعم أنتِ يا مصر / الشاعر / أيمن صبري أبو عماد
الأحد فبراير 01, 2015 7:16 am من طرف 
اليومية
