قصيدة حب ... بقــلم أ/ مهنــى أبو سلطـــان

قصيدة حب ...
---------------------------------
قـلـتـللـك مــا حبـيتِـك ..... وظنّي بحُبك ياما خـــــاب
وعمري ما عدّيت نـجـوم .. لما طيفك عني غـــــــاب
وعمرو دمعي يا هالبنت .. عـا بُـعـدِك ما كان سكــاب
وسهم عيونِك مهما كان .. عمرو لعيـوني مــا صـــاب
ولمـا تغيـبي كنت ارتـاح .. غيابك راحــة ومش عـذاب
وقلبي متل صخور الصنّ .. وبـْحُبـِـك عـمـرو مـــا ذاب
وقُـبلاتِـك مـتل العلقـَـم .. ما عم تعطي شهد رْضـاب
وعمر شفافِـك ما كـانـوا .. لا ريـحــــان ولا عِنّـــــــاب
وكرمـالِك مش راح أكتب .. ولا ألـبس للشّعـر ثيــــاب
مــا أروع يـومـي بـلاكي .. احـلا شي فيكـي الغيــاب
عمري مـا كتبتلّك حـرف .. وكنت استنّى ييجي جواب
وعمـرِك مـا كنتي حلـوة .. ولا مـرة نلتـي الإعجــــاب
ولو غبتي عني شي يوم .. بـلاقي يومـي بالتّرحـــاب
أوعـوا تـكــونـوا صـدّقـتـوا .. يحرق (تـيني) شو كــذاب
m.a.s
ـــــــــ