(( مفيش عدل ))
..............................
ياقاضى العدل مين اللى برّأ الجانى
نسيت عبّارة السلام واللى قتل أبنائى
ياقاضى الزيف مين اللى برّأ الجانى
نسيت قطر الصعيد وحريق أجسادى
ياقاضى العدل فين العدل فى بلادى
سنين مسجون الحق تايه فى أكفاني
ياقاضى الغدر مين اللى برّأالجانى
نسيت الوبا اللى عشش فى أحشائى
نسيت الدمعة فى عيون الصبي
وأنا الأب عاجز فى أغلالى
نسيت العلم اللى هجر عشى
والورد اللى دبل فى أغصاني
ياقاضى العدل فين العدل فى بلادى
نسيت زرعى المسرطن
وسرقة عمرى وأحفادى
....................
بلادى السمرا كانت أغلى أيامى
بلادى العزّة كانت واحة لألواني
ياقاضى العدل ضاع العدل فى بلادى
.........
أنا المصري أنا ابن السد والنيل
أنا المصري أنا إسلام وإنجيل
ياقاضي العدل لو عادل حدودك فين
اللى سرق أمّة عايش مابينا أمير
واللى سرق قوتى بعدلك صبح تنين
واللى بنى مصر عايش مابينا فقير
ياقاضى العدل ما تقوللى عدلك لمين
تلاتين سنة مانطقت كلمة حق ف الخينين
تلاتين سنة عدلك سيف يحمى كل عميل
تلاتين سنة بلادى تتجرّف من الوطيين
ولادنا تموت والبراءة للقاتلين
ما تقوللى ياقاضى العدل عدلك فين
مفيش عدل عدلك كلام مهابيل
الأحد فبراير 01, 2015 7:16 am من طرف 
اليومية
