حكم مغلولة .. بقــلم ا/ سيــد نصــر

حكم مغلولة
.................
لو كنت عايز تعيش في مصر
إوعى تفكر بدماغك
أو يكون لك راى
خليك مع القطيع
خليك مطيع
خليك من عبيد الفرعون
ودور زي مابيدور
الكون
هو انت اللي ها تصلح
الكون
وصايا خالدة
لسكان المقابر
مكتوبه على جدران
عقول الناس
من زمن غابر
الخوف يصنع من
المؤمن فاجر
زي ما الجوع يخليه كافر
وكلها حكم ومآثر
امش جنب الحيط
عامل في مصنع أو
فلاح في غيط
خليك شاطر
مافيش امل
الأمل بعد عن وطنا
من زمان رحل وسافر
الكلام ده ماعدش
له لازمه
ارميه ورا ظهرك
وامش عليه بالجزمه
في وطن جريح
بيتعرض للمحن مشلول
كسيح
عيب علينا نعيش
كما الحريم
حتى الحريم رمى لباس
الخوف
دا القتل عا المكشوف
من غير حيا ولا كسوف
بنات في عمر الزهور
م البرد بتتلفع
لابتخاف من دبابة ولا مدفع
هو مين اللي بيحب
الوطن اكثر
اللي بينافق ويرفع المباخر
ويسبح بحمد سيده
ويباهي بالكدب ويفاخر
والا شباب زي الورد
حاطط روحه على ايده
وبيحاول
يرجع وطن
من ستين سنة
ضايع
في ايد عساكر

------------------