غاده
سيادة المواطن
صباحك مرح
وجمعتك فرح
ورفقتك مهما تكون اسمها السعاده
قل لى :
هااااا؟
ناوى الجمعه دى تزور مين واحشك من زمان ؟
ولا اقولك معاك رصيد ؟
ما توزع رناتك يا مواطن وبطل بخل كده ده انته دايما ابو الكرم
ها تخرج النهارده ؟
ايه موش قادر ؟
لالالا ما فيش الكلام ده على الاقل تخرج لصلاة الجمعه
ولا لزيارة الكنيسه تسلم على حبايبك كده وتقول لربك شكرا على عطاياك ال مغرقانى ؟
ايه ؟ بتتنهد ليه ؟ بتقول ايه ؟ باتريق عليك ؟ فاكراك متنغنغ ؟
يا عم ..صل على حبيبك كده ووحد الله .. موش الحمد لله عارف
تقرأ الكلمتين دول ال باكلمك بيهم ؟
اهو دول كفايه ... كفايه ان عينيك اسم الله عليك لسه شغالين ولو بمساعدات خارجيه من فنيين النضارات الطبيه وان كنت سامعنى
برضك قول الحمد لله ياما فيه ناس نالها حتى الاحساس
وهو لوحده نعمه ..واجب الشكر عليها ..
موش حسيت بكلامى برضك ؟
ما خدتش بالك انه من القلب ؟
وناوى يوصل للقلب ؟
اه والله ..
قووم كده واخلع الحزن والهم وتقل الدم من على الايام قبل ما تكتر الغيوم وتتلم ..واخرج يمكن ترجع بخبر حلو ..ولا تقابل فى الطريق
واحد كان واحشك من زمان ولا تتكعبل فى صاحب لك مصلحه متعلقه يمكن يقضيها لك ..ولا تاخد دعوتين من الحاجه وهى سامعه صوتك بتخبط عليها خبطتك ال عودتها عليها ..وتسمعها وهى بتقول اللهى تسعد يابنى طول الاسبوع مطحون وبدل ما تريح نفسك جاي تريح قلبى؟..الله يريح قلبك
خلاص ؟ ها تخرج ؟
تمام
ممكن بقه يا همام اطلب طلب مجانينى شويتين ؟
ممكن تشترى لى بجنيه بلالين ؟
وان لقيت بنوته حلوه
ولا ولد اسم الله عليه من العين
مد ايدك كده زي جدك زمان وخرج من جيبك زي الجدعان بالونه ولا اتنين
واعطيهم وفرحهم وافتكر كده شكلك وانت فى سنهم لما كانت تجيك حاجه حلوه بتحبها من غير ميعاد
انا عن نفسى ..بيفرحنى شكل البلالين لانها دايما تفرح العيال الصغييرين ..ولو مكسوف تخرج من جيبك زي الحاوى من جيبك بالونه
خلاص يا عم عشان تعرف انى موش مجنونه ..اشترى كيس بمبونى
وكبير كان ولا صغير ال تقابله ابتسم له وحلى لحظة ما شافك بوقه
وفى سرك ادعى وقول حلى ايامى وايام غيرى يارب وابعد عنا كل الكرب
هاااا؟
اتفقنا ؟
يا سيادة المواطن
وزع حب تحصد حب
صباحك حب
قول ان شاء الله تستجيب دعواتى يارب
—
*********
الأحد فبراير 01, 2015 7:16 am من طرف 
اليومية
