غاده
سيادة المواطن
قالوا زمان ..اهل الحكم والمواعظ ..
من جاور السعيد يسعد
ومن جاور الحداد انكوى بناره
ان حبيت فى يوم الصحبه ..صاحب ابو ابتسامه منين ما يكون
وعلى اى حال يكون ..ان كان فقران ولا عيان ولا مسكين غلبان
المهم يكون بيبتسم من القلب موش زي الديب بيبتسم ابتسامة
المكار ليل نهار وصوته اما يتكلم حنين بفحيح ولا فحيح التعبان
وهوايته يغير جلده على حسب الظروف كل ما كان فى الامكان
دور على صاحب ..يتصاحب ..دنيا وآخره
وان حبيت تلاقيه بسرعه ..خد الوصفه دى ونفذها على كام جرعه
اولا :
عيش بنى آدم
وانوى تموت بنى آدم
واحترم كل بنى آدم
وارحم كل روح حتى لو كانت موش لبنى آدم
واتقى الله فى كل ال تعمله يا بنى آدم
ان واظبت على الوصفه دى
ها ترزق من وسع بقدر آدميتك ...بنى آدمين ..يردو لك الدين
اما ان خالفتها وعملت عكسها ..ما تدورش كتير على ناس صالحين
ولا تعتب على ال تشوفه منهم وتشتكى وتدور تغنى ياليل ياعين
وتعمل فيها وحيد ومكسور مقهور حزين
الخلاصه :
ال ها تقدمه باليمين
ها يرجع لك باليمين
واهل اليمين
دول زيى زيك كده موش ملايكه لا ....دول برضك بنى آدمين
ربنا يرزقك ويرزقنا
قول يارب
آمين
------------------------
--------------