غاده
سيادة المواطن
خير اللهم اجعله خير ....خبطت راسى فى درفة الشباك
واذ فجأة لقيتنى سافرت بالذاكره ....لورا ...هناك
وفجأة كده ..سمعت صرير عجلات العيال بره وهي بتلعب بعجل
معمول من غطيان الكازوزه
واتلفت هنا ..ال ايه ..الاقى الملايه ال ناتشينها من الدولاب
وعاملينا انا واخواتى خيمه مربوطه فى عمدان السراير
وادخل انكش من جديد فيها الاقى العروسه القماش ال عملتها
لى نينا بأديها ..وجنبها العرايس ال كان بيجيبها خالى زمان ال شبه العيال الكورى بعيونها السودا وشعرها الاسود وفستانها الاخضر ابو خطوط حمرا وجسم بلاستيك ..ولعب اخويا ال بيشبط فيها كل ما نخرج
وفجأه الاقى لك ال بينتشنى ..ويقول بسررعه ..الجمعه ها تأذن وانتم لسه ريحتكم تعمى ..والاقى الليفه تجرى وانا اصرخ ..واخويا يصرخ
واسمعنا بنقسم من الميه الملهلبه آآآه ...أاييييه ...أأأووووه ...آآآآآى ..وتسمع يابنى صوت نينا وهي تقول اخرص انت وهيه فى الحمام مافيش كلام
وانا باتفرج عليا انا والواد بنتشوى ونتسلخ وموش عاوزينا نفتح بوقنا بحرف
بس بينى وبينكم
شوفتنا خرجنا بنبرق ولا الجديان لما يحلقولها زمان ..لون جلدنا ..احممممممرر
وريحتنا حلووووه ...ولابسين هههههههههههههههههههه بيجامات يوم الجمعه ام لعب وعرايس مطبوعه على القماش كله ..
وتسمع يابنى بصوت بيصرخ ويقول ولا الغول
فز انته وهيه ال موش ها يجى ياكل مالهوش أكل تانى ..نجرى ..
نقعد على الطبليه ولا المسحورين ..كل ال يتحط ادامنا لازم يتنسف والا
يطلع الشبشب من حيث لا تدرى ولا تحتسب
ووبعدها بالامر المباشر نقوم نرفع الاكل ورا امى ..بنظرة عين واحده يابنى من غير حرف ههههههههههه بالتخاطر ولا افلام الاطباق الطائره ال كنا بنتفرج عليها فى التليفزيون يوم السبت فى برنامج نادى السينما
ونسمع صوت قرآن الجمعه ..يلبس آبا الحاج الجلابيه والطاقيه البيضا ويمسك السبحه ويخطف الواد اخويا من دراعه خطف ...صحيح كان بيصعب عليا انه ما كملش الفيلم الكارتون ال قبل الصلاه بس بافرح فيه
الرخم ال طول ماهو قاعد يحكى لى الاحداث كما لو كان ارنست هيمنجواي ال مألفه سيادته ..وبافرح اكتر لان معنى انه ينزل بابا للجمعه
انه ها يخرج من صلاة الجمعه ..ويشترى لنا فاكهه وبما ان اخويا معاه يعنى ها يشترى بزياده عشان فيه ال يشيل معاه ..وال ها يشبط بطفاسه ويخليه يشترى اكتر كل ال يشاور عليه ...هههههههههههههههههههه
ونحلى ببطيخه ولا برتقال وموز ..وفجأه برضك بدون سابق انذار
تلاقى النور ضلم والبلكونه اتواربت ..عشان الدبان ما يباتش فى البيت
وننام اتوماتيك ..تقولش كانوا دكاترة تنويم مغناطيسى ؟
ونصحى ..وهدومنا على العشا كده متحضره عشان خارجين
فى ساعتين ..تلاقينا لفينا على نص العيله ..ساعه عند الحاجه ام ابويا
كل اعمامى وعماتى هناك
وساعه تلاقينا عند خالى ولا خالتى واحد منهم بعياله بيستناك عند التانى ال رحت له هناك
على الساعه تسعه ننام من التخمه
تخمة فرح
تخمة مرح
تخمة كل حاجه حلوه موش لازم تكون تخمة لحمه
وفقت ..من الخبطه
والبرفيوم مغرقنى ..والعيال بقالب تلج على راسى بتلحقنى
وانا بامسك فيهم عشان يقومونى ..ويسندونى ..
بصيت لهم كده
وانا باقول لهم ليه كده فوقتونى ؟؟
لولا انكم عيونى ولا كنت رضيت افوق لكم من نومى
بس الحمد لله ..لسه يمكن لينا يومين ..نعيشهم ونخلى غيرنا يعيش
معانا وويانا يومين حلوين ..طالما اننا له فاكرين ايام ما كانت الدنيا ..كلها مليانه بنى آدمين ..عارفين ان اليوم ال بيروح عمره ما يرجع ..
والجدع هو ال يخلى فى ذاكرة ال حواليه سنين حلوه وايام حلوه ولحظات حلوه ..ان ضاقت بيه الدنيا ولا ان انخبط فى نافوخه مره تانيه
يااخد منها ويلون عمر ولاده واحفاده بالوان من السعاده ال علمها له اجداده ...
سيادة المواطن
موش مهم انته غنى ولا فقير
المهم ...
سيب لأولادك واحفادك ايام حلوه .. يفتكروك بيها يا كبير
سمعتنى ؟
فهمتنى ؟
قصدى وصل يا سيادة المواطن ؟
ايه ؟
بتقول وصل ؟
طب الحمد لله
-------------------
الأحد فبراير 01, 2015 7:16 am من طرف 
اليومية
