كيف يجيب العربي على السؤال ... بقــلم أ/ مهنى أبوسلطــان

كيف يجيب العربي على السؤال ...
السؤال ـ كيف حالك ؟
------------------------------
الجواب ـ والله ماشي الحال .. داحلين .. شو نعمل الحياة هيك يا أخي صعبة جداً .. خصوصاً بهالأيام .. ع زمان آباءنا كانت أبسط وأسهل وأهدا بال .. بس اليوم يا صاحبي والله ما بتعرف من وين تيجيك المصايب .. يعني كانوا زمان ما يسألوا عن شي .. خبز الطابون "التنور يعني" (هذا توضيح لأهلنا في بلاد المغرب لأن الطابون عندهم كلمة سافلة) موجود ع مدار الساعة .. البيض البلدي .. اللحم البلدي .. الزغاليل "الحمام" .. اليوم ما بطلع الواحد من البيت وبرجع ومعه فرنك واحد .. شو هالشغلة يا زلمة ؟؟
--------------------------------------------------------------
سؤال ثاني ـ سمعت انه رجلك بتوجعك صحيح ؟؟
--------------------------------------------------------------
الجواب ـ في الحقيقة آلام الرجلين صايرة ظاهرة هالأيام .. وهي إما مرض وإما عرض لمرض .. فالتهاب المفاصل ينشأ عن عدة عوامل .. منها التهابات في العمود الفقري .. وفقر الدم .. وأحياناً بكون الألم مجرد عرض لوجود انزلاق غضروفي .. وهذا كثير في الدول النامية .. بس في اوروبا وامريكا والدول المتقدمة تلاقي آلام المفاصل والرجلين أخف من عندنا .. ليش ؟ لأنو هناك يا أخي الطب متقدم جداً بعدين الناس هناك بتخذوا إجراءات وقائية من الأمراض وكل شي بأثر عالصحة .. من الفحوص الدورية إلى محاربة التلوث البيئي الناتج من عوادم السيارات ودخان المصانع وأعمال المناجم .. لأنها بتسبب أمراض السرطان والعياذ بالله .. بتعرف إنو الشاحنات الكبيرة عندهم الها طرق خاصة فيها ..؟؟ وهدا شي بقلل من حوادث السير .. أما عندنا بتلاقي الواحد بسوق وطاير في هالشارع وما معو رخصة سواقة .. أو متعلمله درسين سواقة ونجح بالتيست بالواسطة .. هو شو دمر أمتنا غير الواسطة والمحسوبية ؟ صار اذا الك معارف في الدولة أمورك تمشي .. أما إذا فقير ومعثر وما الك حدا والله بموتوك قبل ما يمشولك معاملة .. اذا ما بتدفع رشوة ما بمشي حالك حبيبي .. كل أنظمتنا العربية فاسدة ومفسدة يا صاحبي .. وما بدها لا تدير بالها عالمواطن ولا على قضايا الأمة .. ولك قضية فلسطين نسيوها تماما .. هاي الشعب الفلسطيني مين بجيب سيرتو ؟؟
واتطلع شو بصير في مصر وسوريا والعراق .. واجانا عالساحة السياسية تنظيمات وفصائل جديدة ما أنزل الله بها من سلطان .. لعبة دولية كبيرة يا أخي .. ومصالح دول كبيرة بتلعب في منطقتنا واحنا نايمين .. الله يخلصنا من حكامنا بس .. وييسرلنا قائد رباني مثل صلاح الدين الايوبي .. صحيح هو صلاح الدين كردي بس احنا ما منفرق بين القوميات طالما انو مسلم صحيح .. لانو "إن أكرمكم عند الله أتقاكم" .. وعلى زمن صلاح الدين كنا هيبة والله .. ولا ع زمان الخلفاء السابقين .. كان الخليفة مش مجرد مسؤول .. كان يعرف بالشعر والأدب والحكمة والطب أحياناً .. ويشجع العلم .. الخليفة المأمون كان يعطي كل واحد يألف كتاب وزنه ذهب .. ومن هيك كان عندنا العلماء والفلاسفة اللي اسماءهم بتضل عبر التاريخ مثل ابن سينا والرازي وابن رشد وكثير غيرهم .. هدول برعوا في العلوم الطبيعية والجغرافيا والفلك .. وعلم الاجتماع .. ولما تخلينا عن دربهم دبت فينا الأمراض .. صرنا بيئة خصبة للأمراض بتعرف ليش .. لآنو بعاد عن الدين .. ألله سبحانه وتعالى بخفف من الأمراض إذا بكون الإنسان مؤمن وملتزم بدينه .. اتطلع على أمتنا اليوم بتلاقي ألف حزب إسلامي وكلهم مختلفين مع بعض رغم انهم كلهم بقولولك مرجعيتهم الكتاب والسنة .. وهدا بكفـّر هدا .. وهدا بقتل هدا .. ونزاعات عالسلطة .. وعالمال .. والعملانيين من جهة والشيوعيين من جهة .. وطاسة ضايعة .. الحمد لله ع كل حال .. بالنسبة الي خف اليوم وجع رجلي !!
(( أنا شخصيـاً ما راح أسأل حدا إذا بسمع إنو رجله بتوجعه ))
m.a.s
ـــــــــــ
--------------------------